Os nacionalistas aseguran que o municipio leva «máis dun ano sen rumbo» e critican que se desbote o emprazamento previsto para o novo centro de saúde
Fisterra, 17 de setembro de 2026. O BNG de Fisterra denuncia a situación de «inacción e parálise» que, ao seu xuízo, vive o municipio desde a chegada ao goberno local do Partido Popular tras a moción de censura. A formación nacionalista asegura que diferentes proxectos considerados prioritarios para a veciñanza continúan sen avances e que o Concello leva «máis dun ano sen rumbo».
Un dos principais focos da crítica do BNG é o futuro centro de saúde. Os nacionalistas consideran «un despropósito» que o executivo local estea a valorar a adquisición dunha nova parcela en lugar de utilizar o emprazamento municipal situado en San Roque, que, segundo lembran, fora proposto pola propia formación.
O BNG lembra que o ano pasado se alcanzou un acordo no Parlamento de Galicia, impulsado polo deputado nacionalista Óscar Insua e ao que tamén se sumou o PP, para instar o Concello de Fisterra a realizar as xestións necesarias para a cesión á Xunta dun terreo municipal destinado ao novo centro sanitario.
Segundo a formación nacionalista, «esta parcela pública tiña que estar xa cedida», polo que considera que a procura dun novo terreo pode supoñer un novo atraso na execución do proxecto. O BNG reclama tamén maior información sobre a posible localización da parcela que estaría estudando agora o Concello.
«Só temos noticias de que están buscando un terreo que non sabemos onde está situado; non entendemos a razón de tanto escurantismo», sinala a formación.
Críticas aos servizos públicos
A situación da atención sanitaria é outro dos asuntos sinalados polo BNG. A organización denuncia que Fisterra continúa sen servizo de pediatría e cuestiona a actuación do goberno municipal para intentar solucionar esta carencia.
No ámbito educativo, os nacionalistas poñen o foco no CEIP Mar de Fóra, onde, segundo aseguran, permanece inacabada unha actuación nun dos accesos a unhas instalacións utilizadas como patio de recreo. O BNG cualifica o estado desta zona de «deplorable e perigoso para o alumnado».
A formación tamén denuncia o estado de diferentes espazos públicos, entre eles paseos, parques e accesos ás praias, e reclama actuacións de mantemento e mellora.
Outro dos proxectos mencionados é a rehabilitación da Capela do Bo Suceso. O BNG critica a «pouca celeridade» na súa recuperación e afirma que o inmoble leva tempo nun «estado lamentable».
Así mesmo, os nacionalistas cuestionan que a ordenanza municipal de autocaravanas, aprobada en pleno hai máis dun ano, aínda non se desenvolvese na práctica.
O BNG cuestiona os efectos da moción de censura
A portavoz municipal do BNG, Tereixa Fernández, atribúe esta situación á moción de censura que levou o PP ao goberno municipal. Segundo Fernández, tratouse dunha operación «irresponsable» que, na súa opinión, non tería resolto os problemas que motivaron o cambio de executivo.
«A parálise que vivimos é froito dunha moción de censura irresponsable pensada só en tocar poder a calquera prezo», afirmou a portavoz nacionalista.
Fernández tamén cuestionou a xestión do actual executivo e asegurou que o goberno do PP «gobernou de rendas», ao considerar que boa parte das obras, infraestruturas, programacións e mesmo os orzamentos proceden de etapas anteriores nas que participou o BNG.
A portavoz nacionalista reclamou, ademais, unha maior implicación da Xunta de Galicia en diferentes asuntos que considera prioritarios para Fisterra, entre eles o proxecto do Cabo Fisterra, a xestión do Faro e a creación dunha residencia para persoas maiores.
Neste último punto, Fernández vinculou a demanda coa recente decisión anunciada pola Xunta de ampliar en 1.800 as prazas para persoas maiores e preguntou «que fan os amigos do PP na Xunta» para que estas necesidades non reciban resposta.
O BNG considera que os asuntos pendentes deberían recibir maior atención por parte das administracións e reclama ao Concello avances nos proxectos que considera estratéxicos para o futuro de Fisterra.
