Santiago de Compostela, 18 de setembro de 2026.– O director xeral de Maiores e Atención Sociosanitaria, Antón Acevedo, destacou este xoves o modelo de coidados Galicia Calidade como un referente na atención ás persoas maiores. Fíxoo durante a súa participación na mesa redonda inaugural das V Xornadas da Asociación Galega de Entidades de Servizos Sociais e Dependencia (Agasede), celebradas en Santiago de Compostela.
Durante a súa intervención, Acevedo puxo o foco na necesidade de continuar avanzando cara a un modelo de atención centrado nas persoas, que teña en conta as necesidades individuais, a autonomía e o benestar das persoas maiores e das persoas en situación de dependencia.
O responsable da Xunta tamén reafirmou o compromiso do Goberno galego con este ámbito e salientou a importancia de manter e reforzar a colaboración coas entidades do sector dos servizos sociais, especialmente con aquelas que desenvolven o seu labor no coidado e atención ás persoas maiores e dependentes.
As xornadas de Agasede reúnen representantes do sector dos servizos sociais e da atención á dependencia para abordar os principais retos aos que se enfronta o ámbito dos coidados e compartir experiencias e modelos de atención.
A participación da Xunta neste encontro enmárcase na vontade de seguir traballando conxuntamente coas entidades sociais e asistenciais para avanzar cara a unha atención de maior calidade e máis adaptada ás necesidades das persoas.
