A directora xeral de Promoción da Igualdade, Eloína Ingerto, participou na inauguración do curso escolar e incidiu na necesidade de fomentar relacións baseadas no respecto e no bo trato
Lugo, 18 de setembro de 2026.– A directora xeral de Promoción da Igualdade, Eloína Ingerto, trasladou esta mañá ao alumnado do Colexio Plurilingüe Divina Pastora de Lugo a importancia da educación en igualdade como ferramenta fundamental para avanzar cara a unha sociedade máis xusta e respectuosa.
Ingerto participou na inauguración do curso escolar deste centro educativo, onde mantivo un encontro cos estudantes de Educación Secundaria Obrigatoria (ESO). Durante a súa intervención, destacou o papel que desempeñan as novas xeracións na construción dunha sociedade baseada na igualdade entre mulleres e homes.
“Educar en igualdade é a forma de garantir unha Galicia mellor”, sinalou a directora xeral, quen incidiu na importancia de proporcionar á mocidade as ferramentas necesarias para establecer relacións baseadas no respecto, no bo trato e na igualdade, tanto no ámbito educativo como nas súas relacións sociais.
Neste sentido, Eloína Ingerto puxo en valor a educación como un dos principais instrumentos para previr comportamentos discriminatorios e promover desde idades temperás valores de convivencia, respecto e igualdade.
A directora xeral lembrou tamén que a sensibilización das xeracións máis novas constitúe un dos piares da acción da Xunta de Galicia no ámbito da igualdade. Así, reafirmou o compromiso da Administración autonómica de continuar impulsando iniciativas destinadas a avanzar na igualdade real e efectiva entre mulleres e homes.
O encontro co alumnado permitiu, ademais, achegar as políticas públicas de igualdade aos máis novos e fomentar a reflexión sobre a importancia de construír, desde o día a día, relacións máis igualitarias e respectuosas.
