Toén, Ribadavia, Arbo, Mañón e Outes son os primeiros concellos en formalizar a súa adhesión á iniciativa
Santiago de Compostela, 18 de setembro de 2026.– O proxecto da Xunta para crear 25 novas residencias de maiores e 1.800 prazas públicas comeza a dar os seus primeiros pasos coa adhesión formal de cinco concellos: Toén, Ribadavia, Arbo, Mañón e Outes. Ademais, os alcaldes de Moraña e Baiona xa trasladaron verbalmente o seu compromiso de participar na iniciativa.
A conselleira de Política Social e Igualdade, Fabiola García, puxo en valor a rapidez coa que as primeiras entidades locais responderon á proposta do Goberno galego e destacaron a súa disposición para avanzar na procura dos terreos necesarios para a construción dos novos centros.
Os concellos seleccionados recibiron o pasado martes a documentación necesaria para formalizar a súa participación. Desde ese momento dispoñen dun prazo dun mes para adherirse oficialmente ao proxecto. Unha vez completado este trámite, terán un ano para poñer á disposición da Xunta unha parcela que cumpra os requisitos establecidos para acoller o equipamento residencial.
24 centros máis o de Ribeira
O plan contempla 24 novos centros residenciais en concellos galegos de menos de 25.000 habitantes, aos que se suma a residencia prevista en Ribeira, que queda fóra do procedemento de adhesión ao tratarse dun caso particular e cuxos trámites xa están avanzados.
Os 24 equipamentos distribúense en 12 lotes. Cada lote estará integrado por unha residencia de máis de 100 prazas e por outro centro de menor tamaño, con 30 prazas, situado nun municipio próximo.
A iniciativa pretende reforzar a rede pública de atención ás persoas maiores e dependentes e achegar os recursos residenciais a zonas que actualmente carecen de prazas públicas para persoas con graos II e III de dependencia.
Oito centros na Coruña
Por provincias, a distribución prevista contempla oito novos centros na Coruña, nove se se contabiliza o proxecto de Ribeira; sete en Pontevedra; cinco en Ourense; e catro en Lugo.
A Xunta estima, ademais, que o desenvolvemento destes novos equipamentos permitirá crear arredor dun milleiro de postos de traballo vinculados ao sector dos coidados.
Coas primeiras adhesións xa formalizadas, o proxecto entra agora nunha nova fase na que os concellos deberán avanzar na identificación e posta á disposición dos terreos necesarios para facer realidade os novos centros residenciais.
