Unha persoa resultou contusionada nun accidente de tráfico rexistrado na estrada AC-552, ao seu paso polo termo municipal de Carballo, concretamente no quilómetro 34, entre a entrada da autovía e a fábrica de conservas Calvo.
Un particular alertou o 112 Emerxencias Galicia para informar da colisión entre dous turismos. Afortunadamente, os danos persoais provocados polo sinistro foron mínimos, aínda que foi necesaria a intervención dos servizos sanitarios.
Unha ambulancia do 061 desprazouse ata o lugar para atender a unha das persoas implicadas, que presentaba contusións e que finalmente foi trasladada para recibir asistencia médica.
Pola súa banda, dúas patrullas da Policía Local de Carballo acudiron ao punto do accidente para regular a circulación, xa que foi necesario cortar un dos carrís debido á gran cantidade de restos materiais e cristais que quedaron espallados pola calzada tras o impacto.
Os axentes encargáronse de garantir a seguridade na zona mentres se procedía á retirada dos restos e á recuperación da normalidade no tráfico.
