O Partido Popular de Pontedeume reclama ao Concello unha actuación urxente para solucionar o estado de deterioro que presenta a zona de aparcamento situada fronte ao centro de saúde.
Segundo denuncian os populares, as numerosas irregularidades e danos existentes no acceso ao aparcamento están a provocar problemas aos vehículos que utilizan diariamente este espazo. O PP asegura que varios veciños sufriron xa golpes nos baixos dos seus coches ao pasar por determinadas zonas debido ao mal estado do firme.
Desde a formación sinalan que esta situación afecta especialmente ás persoas que acoden ao centro de saúde, xa que se trata dun lugar empregado habitualmente para deixar os vehículos durante as consultas médicas.
O PP de Pontedeume advirte, ademais, de que o problema non se limita aos danos que poidan sufrir os automóbiles. As irregularidades do terreo tamén poden dificultar o tránsito peonil e incrementar o risco de tropezos e caídas para as persoas que pasan pola zona.
Por este motivo, os populares solicitan ao Concello que adopte as medidas necesarias para reparar canto antes o acceso e o firme do aparcamento, co obxectivo de garantir unhas condicións adecuadas tanto para os vehículos como para os peóns.
A formación considera necesario que se dea unha solución a un espazo de uso habitual por parte dos veciños e, especialmente, das persoas que se desprazan ao centro de saúde.
