Os socialistas denuncian que o novo deseño da vía deixa un paso demasiado estreito, que dificulta o cruzamento de vehículos e o acceso de autobuses e emerxencias
O Grupo Municipal Socialista de Arteixo presentou un rogo no pleno da corporación para reclamar ao Goberno local unha corrección urxente nos traballos da primeira fase de humanización da Travesía de Arteixo. Os socialistas advirten de que o deseño que se está a executar deixa unha anchura de calzada insuficiente no punto de acceso ao parque do Seixedo.
Segundo denuncia a formación, o estreitamento da vía nesta intersección dificulta o cruzamento simultáneo de dous vehículos e pode complicar o acceso de autobuses e vehículos de emerxencia que precisan chegar a esta zona.
O voceiro socialista, Martín Seco, cuestionou o deseño da actuación e asegurou que, ao seu xuízo, a execución da obra está a xerar problemas de mobilidade e seguridade viaria. «Unha obra de humanización ten que servir para ordenar o tráfico e dar seguridade, non para crear un colo de botella nun dos parques máis concorridos do noso concello», sinalou.
O PSOE asegura que varios veciños e condutores trasladaron ao grupo municipal a súa preocupación pola anchura que está a quedar no acceso ao Seixedo. A formación considera que o problema debería corrixirse antes de que os traballos da Travesía de Arteixo estean rematados.
«É incomprensible que nunha obra de millóns de euros na Travesía de Arteixo se execute un acceso ao parque do Seixedo polo que non poden pasar dous coches á vez nin un autobús con seguridade», afirmou Seco.
Os socialistas reclaman ao Concello que revise a solución executada e adopte as medidas necesarias para garantir un acceso fluído e seguro para os vehículos particulares, o transporte público e os servizos de emerxencia.
A formación municipal insiste en que a súa petición pretende que a actuación sexa revisada «a tempo», antes da finalización das obras, para evitar que o novo deseño da vía poida converterse nun punto de conflito para a mobilidade na zona.
