O Concello de Cabanas comezou esta semana os traballos de poda das árbores situadas na contorna da mediana de aparcadoiro do Paseo Marítimo, co obxectivo de garantir o seu mantemento e previr posibles problemas durante a tempada de chuvias.
As tarefas permitirán controlar a forma e o tamaño das árbores, así como reducir a acumulación de follas que poden obstruír os rexistros e as arquetas de drenaxe. Deste xeito, búscase evitar posibles atascos e reducir o risco de asolagamentos en períodos de precipitacións intensas.
Mantemento dos bancos do Paseo Marítimo
Ademais dos traballos de poda, o Concello está a realizar labores de mantemento dos bancos do Paseo Marítimo. As actuacións inclúen a limpeza das superficies e a aplicación dunha imprimación de verniz para mellorar a conservación do mobiliario urbano.
Con estas intervencións, o Concello de Cabanas busca protexer os elementos do espazo público fronte á choiva e á humidade propias do inverno, contribuíndo ao coidado e á conservación dun dos espazos de paseo e lecer do municipio.
