A xornada terá lugar este venres 16 de outubro, ás 19:00 horas, no Auditorio Capela do Pilar, coa participación de Henar Diéguez Rapa.
O ciclo «O Que Arde» (Xornadas Arredor do Lume) regresa este venres, 16 de outubro, a Corcubión coa súa segunda entrega, unha sesión dedicada a desmontar falsas crenzas e bulos arredor do lume e dos incendios forestais.
O encontro celebrarase ás 19:00 horas no Auditorio Capela do Pilar e contará coa participación de Henar Diéguez Rapa, axente medioambiental e bombeira forestal, con experiencia en extinción de incendios desde 2016 e na creación e xestión de bosques comestibles.
Técnica en Xestión Forestal e do Medio Natural, Diéguez Rapa posúe un perfil multidisciplinar que combina coñecementos de xardinería, agricultura ecolóxica e plantas medicinais cunha visión holística da natureza. O seu traballo céntrase tamén na promoción de ecosistemas resilientes e na comprensión das relacións entre os distintos elementos do medio natural.
Baixo o título «Cinza e terra queimada (desmontando bulos)», a convidada ofrecerá unha reflexión pausada sobre o lume, abordando as falsas crenzas e as informacións enganosas que se xeran arredor dos incendios forestais. A sesión pretende achegar coñecemento, fomentar o pensamento crítico e contribuír a unha mellor comprensión dun fenómeno que afecta directamente aos ecosistemas e ao territorio.
Desde a organización animan a veciñanza e a todas as persoas interesadas a participar nesta nova cita e a seguir construíndo comunidade arredor do lume, do territorio e da súa conservación.
Cita: venres, 16 de outubro, ás 19:00 h.
Lugar: Auditorio Capela do Pilar, Corcubión.
Actividade: «Cinza e terra queimada (desmontando bulos)», con Henar Diéguez Rapa.
