Os sindicatos denuncian o inmobilismo da patronal na negociación e anuncian novas mobilizacións os días 22, 23 e 24 de decembro se non hai avances.
O persoal do comercio de alimentación da provincia da Coruña chegou este martes á súa décimo cuarta xornada de folga, a terceira no que vai de outubro, para reclamar un convenio colectivo digno. Segundo a CIG, o paro volveu rexistrar un seguimento masivo, con almacéns e plataformas loxísticas paralizados e tendas pechadas ou funcionando parcialmente.
Ao longo da xornada, os piquetes informativos despregáronse nas principais cidades e vilas da provincia, mentres que na Coruña as traballadoras e traballadores participaron nunha manifestación para visibilizar as súas reivindicacións. Entre as principais demandas figuran a recuperación do poder adquisitivo, o recoñecemento da antigüidade, a redución da xornada laboral e a mellora dos descansos e da conciliación.
Roberto Pérez, representante da CIG na mesa de negociación, denunciou que a patronal permanece inmóbil desde o pasado mes de agosto e que nin sequera convocou novas reunións para avanzar cara a un acordo. O sindicalista reclamou condicións laborais e salarios dignos nun sector no que, segundo sinalou, existen empresas con importantes beneficios económicos.
A CIG acusa Gadis e Froiz de bloquear a negociación
Pérez criticou especialmente a posición de empresas como Gadis e Froiz, ás que atribuíu un papel determinante no bloqueo do convenio. Segundo denunciou, estas compañías estarían dispostas a asumir as perdas económicas derivadas das folgas, así como o deterioro da súa imaxe pública e os problemas de abastecemento nas tendas, antes que aceptar un acordo.
O representante sindical rexeitou tamén o argumento empresarial de que unha mellora salarial reduciría a competitividade do sector. Como exemplo, lembrou que no convenio do comercio de alimentación de Pontevedra os salarios son superiores e se recoñece a antigüidade, malia competir as empresas nun mesmo mercado.
Ameaza de folga os días 22, 23 e 24 de decembro
Ante a falta de avances, as asembleas de persoal xa acordaron manter as mobilizacións e preparar unha nova convocatoria de folga para os días 22, 23 e 24 de decembro, coincidindo coa campaña de Nadal.
Na manifestación celebrada na Coruña, Alejandra Varela, presidenta do comité provincial de Mercartabria (Gadis), denunciou que a patronal pretende competir a costa de salarios baixos e xornadas laborais excesivas, sen descansos suficientes.
Varela reclamou unhas retribucións acordes cos beneficios que xera o persoal e instou Gadis e Froiz a retomar a negociación con propostas que permitan alcanzar un acordo. De non producirse cambios, advertiu, o conflito laboral podería intensificarse durante unha das épocas de maior actividade comercial do ano.
A CIG insiste en que a solución pasa por un convenio que garanta salarios dignos, recoñeza a experiencia profesional e mellore as condicións de traballo e a conciliación da vida laboral e persoal.
