O convenio permitirá rehabilitar o lagar de sidra, a vivenda e as cabalarizas para frear o seu deterioro. A visita institucional serviu tamén para supervisar a última fase de mellora da estrada DP-1105, cun investimento de 262.000 euros.
Boiro, 22 de outubro de 2026. A Deputación da Coruña e o Concello de Boiro investirán 252.332,38 euros na recuperación do lagar de sidra, a vivenda e as cabalarizas do Pazo de Goiáns, tres construcións do conxunto patrimonial que presentan un importante estado de deterioro. O presidente provincial, Valentín González Formoso, e o alcalde de Boiro, José Ramón Romero, asinaron este xoves o convenio de colaboración que permitirá executar as obras de consolidación e conservación destes inmobles.
A Deputación achegará o 80 % do orzamento, cunha contribución de 201.865,90 euros, mentres que o Concello asumirá os 50.466,48 euros restantes. A intervención dará continuidade aos traballos de recuperación do pazo, despois das actuacións realizadas no edificio principal e na capela.
O obxectivo principal é frear o avance da deterioración e garantir a protección das construcións, algunhas delas sen cuberta, para facilitar a súa recuperación funcional no futuro.
Durante a sinatura do acordo, celebrada no propio Pazo de Goiáns, Formoso destacou o valor histórico e identitario deste espazo para o municipio. O presidente provincial subliñou a importancia da colaboración entre administracións para conservar o patrimonio e poñelo ao servizo da cidadanía.
Pola súa banda, o alcalde, José Ramón Romero, lembrou que a Deputación xa colaborara o ano pasado na rehabilitación da capela e incidiu na necesidade de intervir nestes edificios, que presentan un elevado grao de degradación.
Recuperación das estruturas e dos elementos tradicionais
O proxecto contempla a reconstrución das cubertas derrubadas, respectando a configuración orixinal e os materiais tradicionais, así como o saneamento e a consolidación dos muros de pedra. Tamén se acondicionarán os solos e se recuperarán ou instalarán portas e ventás para protexer os espazos interiores.
Ademais, executarase un sistema de recollida de augas pluviais para mellorar a conservación dos inmobles e reducir os efectos da humidade.
Estas actuacións permitirán asegurar as edificacións e preparalas para futuras intervencións. Os usos definitivos do lagar, da vivenda e das cabalarizas determinaranse mediante proxectos posteriores, procurando manter a coherencia co conxunto histórico e coas obras xa realizadas.
A DP-1105 encara a recta final da súa renovación
A visita de Valentín González Formoso a Boiro incluíu tamén unha supervisión das obras da última fase de mellora da estrada DP-1105, que comunica Noia, Lousame e Boiro e que se atopan xa moi avanzadas.
Esta intervención conta cun investimento de 262.000 euros e permitirá completar a renovación dos 15,6 quilómetros da vía. Nas dúas fases anteriores, a Deputación da Coruña destinara xa 1,5 millóns de euros a mellorar esta infraestrutura.
Os traballos actuais desenvólvense no tramo comprendido entre os puntos quilométricos 14+031 e 15+603, no termo municipal de Boiro. As actuacións inclúen a renovación do firme mediante a aplicación dunha capa de mestura bituminosa en quente de cinco centímetros de espesor, xunto coa mellora da drenaxe, a limpeza das marxes e das cunetas e a renovación da sinalización.
O proxecto incorpora tamén medidas para reforzar a seguridade viaria, como a recolocación dun paso de peóns situado no punto quilométrico 15+107, a construción de dous tramos de beirarrúa e a execución dun pequeno muro de contención.
Con esta última fase, a Deputación busca culminar a mellora dunha estrada relevante para os desprazamentos diarios da veciñanza e para as conexións entre os municipios de Noia, Lousame e Boiro.
As dúas actuacións, centradas na conservación do patrimonio histórico e na mellora das infraestruturas viarias, forman parte da colaboración entre a Deputación e o Concello de Boiro para preservar elementos de interese local e mellorar os servizos e as comunicacións do municipio.
