A formación socialista esixe ao Goberno local que adopte medidas inmediatas para garantir a seguridade e a saúde dos traballadores e traballadoras do Concello.
Socialistas de Curtis veñen de denunciar a falta de Equipos de Protección Individual (EPIs) necesarios para que os traballadores e traballadoras do Concello poidan desenvolver as súas tarefas en condicións adecuadas de seguridade e saúde laboral.
Desde a formación consideran especialmente preocupante que o persoal municipal non dispoña de todos os medios de protección necesarios para realizar determinados traballos, nos que a utilización destes equipos resulta fundamental para evitar accidentes e previr riscos laborais.
Entre os elementos de protección que deberían estar a disposición dos empregados municipais destacan os cascos de seguridade, as botas de protección e o calzado antiescorregadizo, así como os arneses anticaídas para aquelas tarefas nas que exista risco de caída en altura.
Os socialistas lembran, ademais, que a roupa de traballo habitual e os uniformes que non incorporan unha función protectora específica non poden considerarse Equipos de Protección Individual, polo que non substitúen os medios de seguridade que require cada posto de traballo.
Desde Socialistas de Curtis subliñan que a prevención de riscos laborais non é unha cuestión secundaria, senón unha obriga que debe cumprir o Concello como empregador e unha garantía fundamental para a protección do seu persoal.
Por este motivo, esixen ao Goberno municipal que actúe de inmediato, avalíe as necesidades dos distintos postos de traballo e proporcione os equipos de protección adecuados para cada actividade, garantindo unhas condicións laborais seguras para todo o persoal.
«Non se pode poñer en risco a seguridade de quen traballa diariamente ao servizo da veciñanza de Curtis», sinalan desde a formación.
A súa reclamación conclúe cunha mensaxe clara: a prevención non é opcional e a seguridade laboral é unha obriga.
