A formación critica a apertura incompleta da estación intermodal, os cambios nos percorridos dos autobuses metropolitanos e a falta de vontade para impulsar un consorcio de transporte entre os concellos da comarca.
Alternativa dos Veciños denuncia a falta de planificación e coordinación das administracións públicas na organización da mobilidade na comarca da Coruña, unha situación que, ao seu xuízo, está a prexudicar diariamente miles de usuarios do transporte público.
A formación cuestiona a recente apertura da estación intermodal da Coruña, que comezou a funcionar sen contar aínda cos servizos ferroviarios nin co aparcamento para vehículos. Unha posta en marcha que considera incompleta e que compara coa apertura dun restaurante sen cociña.
Ademais, critica a decisión da Xunta de Galicia de obrigar os autobuses metropolitanos a pasar pola nova infraestrutura, modificando os percorridos existentes e incrementando os tempos de desprazamento das persoas que utilizan estes servizos para entrar e saír da cidade. Alternativa dos Veciños considera que esta medida non responde ás necesidades da maioría dos usuarios, que demandan conexións rápidas e eficaces entre A Coruña e os municipios da súa área metropolitana.
As críticas esténdense tamén ao Concello da Coruña, ao que reprocha a súa intención de licitar un novo contrato de transporte urbano para un longo período de anos sen aproveitar a oportunidade de avanzar cara a un modelo de mobilidade metropolitana. Neste sentido, a formación defende a creación dun Consorcio Metropolitano de Transporte que integre A Coruña e os concellos de Oleiros, Cambre, Culleredo e Arteixo, co obxectivo de coordinar os servizos e mellorar as conexións entre os municipios.
Por outra banda, Alternativa dos Veciños alerta das posibles restricións futuras á circulación dos vehículos particulares e cuestiona que as políticas ambientais poidan acabar penalizando especialmente as persoas con menos recursos económicos, que non teñen capacidade para adquirir vehículos novos ou eléctricos. A formación critica o papel que, ao seu entender, exerce o lobby automobilístico na orientación das políticas de transición ecolóxica europeas.
Ante esta situación, Alternativa dos Veciños reclama unha planificación global da mobilidade na comarca da Coruña, baseada na cooperación entre administracións, na execución das infraestruturas viarias pendentes e na implantación dun transporte público eficaz, coordinado e adaptado ás necesidades reais da cidadanía.
A formación considera que a mobilidade non pode abordarse mediante decisións illadas de cada administración, senón cunha visión metropolitana que permita reducir os tempos de desprazamento e mellorar as conexións entre os concellos.
«O que está en xogo é o noso tempo, que se traduce en calidade de vida e na produtividade de empresas e autónomos», conclúe Alternativa dos Veciños.
