

A conselleira presidiu o pleno do Observatorio Galego contra a Discriminación por Orientación Sexual e Identidade de Xénero, no que puxo en valor a escoita e a colaboración para avanzar en políticas de igualdade.
Santiago de Compostela, 17 de novembro de 2026.– A conselleira de Política Social e Igualdade, Ángeles Vázquez, destacou a importancia do diálogo interinstitucional para seguir visibilizando as necesidades do colectivo LGBTI e avanzar na construción de políticas públicas que dean resposta á súa realidade. Fíxoo durante a sesión plenaria do Observatorio Galego contra a Discriminación de Xénero e a Identidade Sexual, que presidiu acompañada pola directora xeral de Promoción da Igualdade, Paula Uría.
Durante a reunión, a responsable autonómica agradeceu o traballo e a disposición ao diálogo das persoas integrantes deste organismo, que permite «escoitar, analizar a realidade social e identificar as necesidades» do colectivo LGBTI.
Na súa primeira intervención neste pleno, Ángeles Vázquez salientou o papel do Observatorio como espazo de encontro e reflexión, así como a súa contribución á transformación das experiencias das persoas en políticas públicas eficaces.
A conselleira tamén incidiu na importancia de dar visibilidade á diversidade sexual e de identidade de xénero, ao tempo que reivindicou a recuperación e preservación da memoria LGBTI como parte fundamental do recoñecemento social e da igualdade.
Con este encontro, o Observatorio continúa a súa labor como órgano de participación e diálogo para analizar as situacións de discriminación, detectar necesidades e contribuír ao impulso de medidas que favorezan os dereitos, a igualdade de trato e a non discriminación das persoas LGBTI en Galicia.
