Últimas semanas para inscribirse no XV Programa de Apoio a Empresas Agroalimentarias da Fundación Juana de Vega

A convocatoria de 2027 incorpora como novidade o itinerario territorial GreenHub Verín-Monteval, dirixido a persoas emprendedoras e empresas de dez concellos ourensáns e da súa contorna.

A Fundación Juana de Vega mantén aberto o prazo de inscrición para participar no XV Programa de Apoio a Empresas Agroalimentarias, correspondente á edición de 2027. As persoas emprendedoras e empresas interesadas poderán presentar as súas candidaturas ata o vindeiro martes, 8 de decembro, a través dos formularios dispoñibles na páxina web programadeapoyo.juanadevega.org.

A principal novidade desta edición é a posta en marcha de GreenHub Verín-Monteval, un itinerario territorial específico destinado a impulsar iniciativas empresariais nos concellos ourensáns da Gudiña, A Mezquita, Castrelo do Val, Cualedro, Laza, Monterrei, Oímbra, Riós, Verín e Vilardevós, así como na súa área de influencia.

O programa mantén tamén a convocatoria xeral, dirixida a proxectos localizados en calquera punto de Galicia.

Poderán participar iniciativas vinculadas aos sectores agroalimentario —produción, transformación e comercialización—, forestal, bioeconomía, marisqueiro e pesqueiro. Tamén terán cabida os proxectos de base tecnolóxica e os servizos de apoio a estas actividades.

Formación e asesoramento especializado

O XV Programa de Apoio a Empresas Agroalimentarias ofrece formación e mentoría especializada a persoas emprendedoras e empresas galegas a través de dúas modalidades: Emprendemento e Crecemento e Consolidación.

A primeira está orientada á posta en marcha de novas empresas, aos procesos de sucesión empresarial e á recuperación de negocios familiares. O seu obxectivo é acompañar as persoas promotoras na elaboración dun plan de negocio sólido que permita definir a estratexia do proxecto e facilitar a súa implantación no mercado coas maiores garantías de éxito.

Pola súa banda, a modalidade de Crecemento e Consolidación está dirixida a persoas autónomas, microempresas e pemes que xa están en funcionamento e necesitan reforzar ou mellorar determinadas áreas da súa actividade. Entre os ámbitos de traballo figuran a análise de mercado, o desenvolvemento de novas propostas de valor, a organización corporativa, os plans de financiamento e comerciais, así como a comunicación e o márketing.

Quince edicións impulsando o tecido empresarial galego

Desde 2012, a Fundación Juana de Vega promove este programa con fondos propios, a través do cal acompañou preto de 150 beneficiarios repartidos por toda Galicia.

Con esta nova convocatoria, a entidade reforza a súa aposta polo emprendemento, a profesionalización e a consolidación do tecido empresarial vinculado aos recursos agroalimentarios, forestais e marítimo-pesqueiros da comunidade.

As candidaturas para calquera das dúas modalidades territoriais, a xeral e GreenHub Verín-Monteval, poderán presentarse ata o 8 de decembro de 2026 na web programadeapoyo.juanadevega.org.