Usuarios da AC-544 alertan do perigo das balsas de auga e reclaman solucións definitivas

Os usuarios da estrada AC-544, ao seu paso por Negreira, alertan do perigo que presentan varios puntos da vía cando chove, debido á formación de importantes balsas de auga que poden comprometer a seguridade da circulación.

Os condutores reclaman ás administracións responsables que tomen medidas para solucionar o problema de maneira definitiva e non se limiten a realizar arranxos provisionais ou «parches» que, segundo denuncian, non resolven a situación.

A preocupación aumenta despois do accidente rexistrado o pasado martes nesta vía, que se saldou cunha vítima mortal. Un suceso que volve poñer o foco nas condicións de seguridade da estrada e nas demandas dos usuarios.

Os afectados piden que se revisen os puntos máis problemáticos, especialmente os relacionados coa drenaxe e a acumulación de auga, e que se leven a cabo actuacións que eviten novos riscos para os condutores.

A súa petición é clara: solucións reais e definitivas antes de que teñamos que lamentar máis accidentes.