Santiago de Compostela, 9 de decembro de 2025.– UCIN Galicia, a través do seu
coordinador José Luis Calo, manifesta a súa preocupación pola falta de transparencia
arredor da condonación de 4.010 millóns de euros da débeda galega incluída no
anteproxecto de lei aprobado polo Consello de Ministros. A medida, pactada no seu día
entre PSOE e BNG no acordo de investidura de Pedro Sánchez, está a ser presentada
como unha oportunidade financeira para Galicia, pero sen explicar quen asumirá
realmente o custo: todos os galegos a través dos seus impostos.
UCIN Galicia lembra que a débeda non desaparece: trasládase ao Estado, que a
incorporará á débeda pública nacional. Isto significa que todos os contribuíntes,
incluídos os propios galegos, serán quen paguen esta operación. Se se reparte a cifra
entre a poboación galega —aproximadamente 2,7 millóns de habitantes—, o impacto
medio é claro: cada galego asumirá indirectamente arredor de 1.485 euros, e cada
familia galega, segundo o tamaño medio do fogar, entre 3.500 e 5.000 euros.
“O que se está a vender como unha condonación é, na práctica, un traspaso de débeda
ao peto dos cidadáns. Galicia merece coñecer canto lle vai custar realmente esta
operación e por que non se está dicindo a verdade de forma completa”, afirma José Luis
Calo.
UCIN Galicia considera especialmente grave que o BNG non explique o impacto
fiscal real para a cidadanía, pese a ser un dos impulsores políticos desta medida nas
negociacións co PSOE. Tamén lembra que esta débeda non é produto dunha realidade
recente, senón o resultado acumulado de decisións de gobernos anteriores e actuais,
polo que a condonación non resolve o fondo do problema nin mellora o modelo de
financiamento autonómico.
“O que Galicia necesita é rigor e estabilidade financeira, non movementos
propagandísticos que acaban pagándose co esforzo das familias galegas. A débeda non
se evapora: simplemente cambia de peto, e por desgraza ese peto é o dos galegos”,
conclúe José Luis Calo.
UCIN Galicia reclama claridade, responsabilidade e información veraz, e pide ao
Goberno que explique de inmediato o impacto fiscal e económico que esta decisión terá
para o conxunto da cidadanía
