A Guardia Civil, a través do seu posto en Boiro, detivo a cinco varóns no marco da Operación Besteiros como presuntos autores de delitos de furto, receptación e maltrato animal con resultado de lesións graves e morte.
A investigación iniciouse tras a desaparición sistemática de gando en zonas de pasto da Serra do Barbanza. Segundo as pescudas, o grupo subtraía as reses e posteriormente vendíaas a membros dunha asociación gandeira, modificando os seus rasgos identificativos para dificultar a súa localización.
Durante o operativo confirmouse tamén a morte de cinco animais por arma de fogo, procedéndose á intervención de cinco escopetas de caza.
As reses recuperadas xa foron devoltas aos seus lexítimos propietarios en Boiro, Porto do Son e Lousame, quedando totalmente esclarecidos os feitos denunciados.
