O pasado sábado celebrouse no Concello de Negreira a I Gala Ritmo & Movemento, unha xornada especial na que as Escolas Deportivas Municipais amosaron o traballo realizado ao longo dos últimos meses. O evento destacou polo seu gran ambiente, a emoción dos participantes e os nervios propios dunha actuación diante do público.
Durante a gala, os grupos de Zumba, Ximnasia Rítmica, Aeróbic, Baile Moderno, Hip-Hop e Ximnasia de Maiores ofreceron pequenas demostracións que puxeron en valor o esforzo, a constancia e a evolución acadada durante o curso. As distintas actuacións enchéronse de ritmo e enerxía, convertendo a xornada nun espectáculo cheo de cor e participación.
Un dos momentos máis destacados foi a presenza da Escola Municipal de Sevillanas, que participou nesta celebración e foi moi aplaudida polo público asistente, engadindo un toque tradicional e festivo ao programa.
Desde a organización tamén se quixo recoñecer o labor das monitoras Raquel Castillo, Pilar Pérez, Aldara Tuñas e Silvia Fadeville, polo seu compromiso e dedicación ao longo destes oito meses de clases, que continuarán ata o próximo sábado 30 de maio.
A gala consolidouse como unha actividade de referencia dentro da programación deportiva municipal, poñendo en valor o deporte, a convivencia e a creatividade no Concello de Negreira.
