A entidade denuncia unha situación asistencial estruturalmente insostible e reclama unha resposta social ante o abandono que sofren pacientes e usuarios.
A Asociación de Pacientes e Usuarios do CHUS alerta de que a situación da sanidade pública na área sanitaria de Santiago de Compostela e Barbanza se está deteriorando a un ritmo moi preocupante.
Os datos parciais publicados ata o momento, aínda que ofrecen unha aproximación á realidade asistencial, non reflicten na súa totalidade a gravidade dun problema que, segundo denuncia a asociación, ten un carácter estrutural e está a alcanzar niveis insostibles.
Detrás das cifras hai persoas. Pacientes que agardan por unha consulta, unha proba diagnóstica ou unha intervención; persoas que ven como a demora na atención sanitaria condiciona a súa saúde, a súa calidade de vida e a súa tranquilidade, así como a das súas familias.
A asociación considera que esta realidade non pode normalizarse nin quedar reducida a estatísticas ou datos administrativos. O deterioro da atención sanitaria pública ten consecuencias directas na vida das persoas e require medidas que permitan garantir unha asistencia digna, accesible e de calidade.
Ante esta situación, a entidade fai un chamamento á cidadanía para tomar conciencia da gravidade do problema e impulsar unha resposta social que permita defender e fortalecer a sanidade pública.
A Asociación de Pacientes e Usuarios do CHUS insiste en que a sanidade pública é un dereito fundamental que debe garantir unha atención adecuada e en tempo razoable, sen que os pacientes teñan que asumir as consecuencias das deficiencias do sistema.
A situación actual esixe transparencia, medidas efectivas e un compromiso real das administracións sanitarias para reverter o deterioro asistencial e situar as necesidades dos pacientes no centro das decisións.
A saúde das persoas non pode seguir agardando. É o momento de visibilizar esta realidade e reclamar unha resposta á altura da gravidade da situación.
