A cuberta do colexio de Valiño non resiste a choiva: familias denuncian filtracións tras as recentes obras

UCIN Boiro reclama unha reparación urxente ante as filtracións de auga nunha cuberta instalada recentemente no centro educativo.

As familias do colexio de Valiño, no municipio de Boiro, denunciaron o mal estado da cuberta instalada recentemente polo Goberno local, despois de que as últimas chuvias deixasen ao descuberto importantes filtracións de auga.

Segundo o vídeo remitido por nais e pais do alumnado a UCIN Boiro, a estrutura presenta numerosas entradas de auga, provocando que tanto os nenos e nenas como as familias teñan que atravesar zonas molladas para acceder ao centro educativo.

A situación está a xerar preocupación entre a comunidade educativa, xa que afecta directamente ás persoas que utilizan diariamente as instalacións, incluídos o alumnado, o profesorado e o persoal do colexio.

Desde UCIN Boiro cuestionan o resultado dunha actuación municipal que, malia ser de recente instalación, non estaría cumprindo adecuadamente a súa función de protexer da chuvia.

A formación reclama ao Goberno local que interveña con carácter urxente para identificar a orixe das filtracións e executar as reparacións necesarias, garantindo unhas condicións adecuadas de acceso e seguridade para toda a comunidade educativa.

«Non abonda con anunciar obras e investir cartos públicos; as actuacións teñen que ofrecer resultados e cumprir coa finalidade para a que foron realizadas», sinalan desde UCIN Boiro.

A formación municipal insiste na necesidade de garantir instalacións educativas dignas e seguras e reclama unha solución inmediata para evitar que o problema continúe afectando ao día a día do centro.

UCIN Boiro pide solucións e reparacións efectivas para o colexio de Valiño, e reclama que os investimentos públicos se traduzan en infraestruturas que funcionen correctamente.