O proxecto permitirá instalar máis de 560.000 etiquetas en 84 supermercados de toda España e evitará en Galicia o uso de case 106 quilómetros de tiras de papel ao ano
Santiago de Compostela, 1 de setembro de 2026. Alcampo está a traballar na incorporación de etiquetas electrónicas en seis das súas tendas de Galicia, dentro dun proxecto de dixitalización que alcanzará 84 establecementos en toda España e que suporá un investimento global de 3,8 millóns de euros durante 2026.
A substitución das tradicionais etiquetas de papel permitirá evitar cada ano nos establecementos galegos o uso de 106 quilómetros de tiras de papel de balizamento, o que tamén contribuirá a reducir en 0,48 toneladas as emisións de CO₂ equivalente.
Antes de finalizar 2026, as etiquetas electrónicas, fabricadas por Hanshow e instaladas co sistema Slimline TM de HL Display, estarán dispoñibles en tendas de Mos, Pontevedra, Lugo e Narón, na Coruña, entre outras localizacións.
As novas etiquetas utilizaranse tanto nas seccións de produtos secos como nas de frescos, incluídos os conxelados. Para iso, incorporaranse modelos especialmente deseñados para resistir as baixas temperaturas, así como formatos de maior tamaño destinados aos mostradores tradicionais.
Ademais de reducir o consumo de papel, a implantación desta tecnoloxía favorecerá a produtividade e diminuirá posibles erros na actualización dos prezos. Segundo os cálculos da compañía, os equipos das seis tendas galegas deixarán de dedicar preto de 2.200 horas anuais ás tarefas relacionadas co etiquetado tradicional, podendo destinar ese tempo a outras funcións, especialmente á atención á clientela.
Un proxecto de alcance nacional
A escala estatal, Alcampo prevé incorporar durante 2026 máis de 560.000 etiquetas electrónicas en 84 supermercados. Ademais das tendas de Galicia, a iniciativa chegará a establecementos situados en Álava, Burgos, Huesca, Madrid, Málaga, Teruel e Zaragoza, entre outros territorios.
O proxecto permitirá evitar anualmente o uso de 1.843 quilómetros de tiras de papel de balizamento, unha distancia equivalente a percorrer case tres veces o traxecto entre Madrid e Barcelona. Esta substitución evitará tamén a emisión de 8,4 toneladas de CO₂ equivalente.
No conxunto das 84 tendas participantes, a compañía calcula que os seus equipos deixarán de dedicar máis de 42.740 horas anuais ás tarefas asociadas ao etiquetado tradicional.
Máis de 6.700 toneladas de papel menos desde 2017
A implantación das etiquetas electrónicas enmárcase no plan de racionalización do consumo de papel que Alcampo puxo en marcha en 2017 nas súas tendas, oficinas e plataformas loxísticas.
Desde ese ano, a compañía reduciu en máis de 6.700 toneladas o seu consumo anual de papel, en gran medida grazas á aposta pola dixitalización e á priorización dos folletos en formato dixital.
En termos de CO₂ equivalente, as emisións asociadas ao consumo de papel reducíronse un 51 % en valor absoluto. A cifra alcanza o 58 % se se ten en conta o valor relativo por metro cadrado de sala de vendas.
Para Eduardo Latorre, director de Conceptos Comerciais, Franquías e Técnico, «a incorporación de etiquetas electrónicas supón dar un paso máis na transformación das nosas tendas e permítenos avanzar en tres ámbitos de máxima importancia para Alcampo: reducir o consumo de papel, facer máis eficientes os procesos na tenda e favorecer que os nosos equipos poidan dedicar máis tempo ao que realmente importa, a atención aos nosos clientes».