Os veciños denuncian o perigo existente na subida da Avenida Posse e reclaman ao Concello de Sada unha reparación urxente
O malestar veciñal en Sada vai en aumento polo estado dunha tapa de sumidoiro situada na subida da Avenida Posse, que, segundo denuncian os residentes, leva máis dun mes levantada e sen ser reparada.
Os veciños advirten de que a situación, lonxe de mellorar, vai a peor co paso dos días, convertendo este punto nun posible perigo tanto para os peóns como para os vehículos.
«Que estamos esperando, a que aconteza unha desgraza?», preguntan indignados algúns residentes, que alertan do risco de que alguén poida caer no oco ou de que un vehículo sufra importantes danos ao pasar pola zona.
Segundo trasladan os veciños, o problema xa foi comunicado previamente ao Concello de Sada, polo que consideran incomprensible que, despois de máis dun mes, a incidencia continúe sen unha solución definitiva.
«Fai falta máis dun mes para arranxar unha tapa de sumidoiro cando xa se deu aviso no Concello?», cuestionan.
A preocupación aumenta ante a posibilidade de que sexa necesario esperar a que se produza un accidente para que se adopten medidas. Os residentes reclaman que o Concello actúe con carácter urxente, asegure a zona e proceda á reparación antes de que alguén resulte ferido ou algún vehículo sofra danos.
Os veciños tamén lamentan que este tipo de situacións xeren unha sensación de abandono e falta de mantemento nas vías públicas e consideran que un problema deste tipo, unha vez comunicado, debería ser atendido sen necesidade de esperar semanas.
A petición dos residentes é clara: que se repare a tapa canto antes e que se elimine o risco existente na zona antes de ter que lamentar consecuencias maiores.
