Ponteceso, 22 de agosto de 2026. A aldea do Couto, en Ponteceso, convértese esta fin de semana nun gran espazo cultural ao aire libre coa celebración da 44.ª edición de Festiletras, que se desenvolve os días 22 e 23 de agosto con propostas para todos os públicos.
A programación deste sábado, 22 de agosto, arrinca ás 11:00 horas e esténdese ao longo de toda a xornada por diferentes espazos da aldea. As actividades son de balde e combinan música, literatura, xogos, propostas infantís e encontros culturais.
Na Eira de Pailetes, a xornada comezará ás 11:00 horas con Karaoke Esteban, para continuar ás 18:00 horas coa actuación de Portosanto. Ás 20:30 horas será a quenda de Brais Morán e Nasaufunk, unha das propostas musicais destacadas da noite.
No Quinteiro, os máis pequenos poderán participar nos Xogos Miudiño ás 11:00 horas, mentres que ás 12:00 horas actuará Cé Pantasma.
A programación continuará na Eira de Cambón, onde ás 12:00 horas estará Rompecinturas Selektor e, ás 17:00 horas, chegará a proposta Lembra Xabarín. Pola súa banda, na Eira da Fundación, Monoulious Dop actuará ás 13:00 horas e Neverloura ás 14:00 horas.
Na Rúa Travesa, o público poderá desfrutar ás 16:00 horas de Pakolas e ás 19:00 horas da proposta de Federico Pérez. Ademais, ás 16:00 horas, as Rúas da Aldea acollerán a música de Mekánika Rolling Band.
A literatura terá tamén un espazo protagonista na Eira das Letras – Eira da Canteixa, con actividades a partir das 16:00 horas. Xosé Tomás será o primeiro participante, ás 16:00 horas, seguido de Pere Tobaruela, ás 18:00 horas, e Miguel Alonso Diz, ás 19:00 horas.
Con esta programación, Festiletras volve reivindicar o Couto como punto de encontro da cultura galega, levando a música, a literatura e as actividades de lecer ás rúas, eiras e espazos da aldea. Unha cita consolidada no calendario cultural da Costa da Morte que permite gozar da cultura en comunidade e descubrir novas propostas nun ambiente aberto e familiar.
A 44.ª edición de Festiletras continuará este domingo, 23 de agosto, completando unha fin de semana dedicada á cultura galega e á dinamización da aldea do Couto.