Os nacionalistas denuncian a falta de investimentos en vivenda pública, sanidade, servizos sociais e infraestruturas, e acusan o Goberno galego de non responder ás principais necesidades da comarca.
O responsable comarcal do Bloque Nacionalista Galego (BNG) na Costa da Morte, Xurxo Rodríguez, cualificou de «cosméticos e insuficientes» os orzamentos da Xunta de Galicia para 2027 na comarca. A formación nacionalista considera que as contas presentadas polo Goberno galego do PP non dan resposta ás principais demandas da veciñanza nin ofrecen solucións aos problemas derivados da suba dos prezos, as dificultades para acceder á vivenda e as carencias nos servizos públicos.
Segundo Rodríguez, os orzamentos non apostan polas políticas sociais que precisa a cidadanía, especialmente nos ámbitos da vivenda, a sanidade e os servizos sociais, nin incorporan medidas suficientes para aliviar o impacto do encarecemento dos carburantes e da enerxía na economía dos fogares.
Sen vivenda pública na comarca
Unha das principais críticas do BNG céntrase na ausencia de novas vivendas de protección oficial na Costa da Morte, tanto para a compra como para o alugueiro. Os nacionalistas denuncian que a Xunta non prevé construír ningunha neste ámbito territorial e lembran que, segundo a súa valoración, non se promoveron vivendas públicas na comarca durante os 17 anos de Gobernos de Alberto Núñez Feijóo e Alfonso Rueda.
A formación considera especialmente grave esta situación nun momento no que o acceso á vivenda se converteu nunha das principais preocupacións da veciñanza.
Críticas aos investimentos sanitarios e sociais
No ámbito sanitario, o BNG reprocha á Xunta que non impulse novos servizos no Hospital Virxe da Xunqueira de Cee nin amplíe o servizo de psiquiatría cun facultativo máis.
Tamén cuestiona o anuncio da adquisición dun mamógrafo, ao entender que se presenta de novo un investimento que xa fora anunciado en 2025 para a súa instalación en 2026. «Tómannos por parvos», manifestou Rodríguez.
A formación nacionalista critica, ademais, que os orzamentos non inclúan unha partida específica para iniciar as obras do centro de saúde de Fisterra. Neste caso, tamén responsabiliza o Goberno municipal, do PP, pola falta de cesión dos terreos necesarios á Consellería de Sanidade.
En materia de atención ás persoas dependentes, o BNG alerta de que a Costa da Morte continuará sen novas residencias nin centros de día que permitan atender as necesidades da poboación, especialmente das persoas cun grao de dependencia II ou III.
A formación denuncia igualmente a falta de apoio económico da Xunta ao centro de día de Corcubión, ao que, segundo afirma, non se lle concederon fondos para facilitar a súa apertura.
Infraestruturas pendentes na Costa da Morte
O BNG advirte de que diversas actuacións consideradas necesarias para o desenvolvemento da comarca continúan sen aparecer nos orzamentos de 2027. Entre elas, cita a conexión do corredor co polígono industrial de Vimianzo, as obras do Porto Mixto de Corcubión, o saneamento de Lariño e dos núcleos rurais de Muxía, así como a eliminación da peaxe da autovía AG-55.
Para os nacionalistas, a ausencia destas actuacións evidencia a falta de compromiso do Goberno galego coas necesidades da Costa da Morte e prolonga a espera por infraestruturas que consideran fundamentais para a comarca.
O BNG reclama medidas con impacto na vida cotiá
Xurxo Rodríguez cualificou as contas de insuficientes e asegurou que inclúen investimentos que xa deberían estar executados hai anos. Tamén criticou as rebaixas fiscais anunciadas polo PP, que considera pouco relevantes para a maioría da poboación e máis beneficiosas para as rendas altas.
O portavoz comarcal defendeu a necesidade de impulsar medidas que permitan mellorar o poder adquisitivo das familias, reducir o impacto dos prezos nos supermercados e nas gasolineiras e aliviar o custo das peaxes para as persoas usuarias da AG-55.
«Na nosa comarca o PP só sabe prometer, niso a verdade é que non hai quen lles gañe; agora cumprir, máis ben nada ou moi pouquiño», afirmou Rodríguez.
O responsable comarcal concluíu expresando a súa confianza en que as actuacións pendentes se fagan realidade cun cambio de Goberno na Xunta de Galicia, e asegurou que o BNG traballará para que a comarca conte cos investimentos e servizos públicos que reclama.
