O BNG reclama explicacións sobre a perda de actividade na lonxa e pide medidas para recuperar compradores e frota
A situación da Lonxa de Laxe volveu ao debate público despois das declaracións realizadas pola Confraría, que asegurou que a instalación non estivo pechada en ningún momento, en contra da información difundida previamente polo BNG. A entidade atribúe parte das perdas económicas á repercusión que tivo esa información.
Desde o BNG matizan agora que a lonxa continúa aberta, pero sinalan que a poxa diaria si deixou de celebrarse, unha diferenza que consideran fundamental para entender a situación actual.
A formación nacionalista recoñece que, se empregou anteriormente unha expresión que non describía con exactitude esta realidade, está disposta a rectificala. Porén, considera que a cuestión principal non debe centrarse na terminoloxía, senón na perda de actividade comercial da instalación.
Neste sentido, o BNG formula varias preguntas sobre a situación da lonxa: por que deixou de haber poxa diaria, por que algúns barcos de Laxe levan tempo comercializando as súas capturas noutros portos e por que a lonxa deixou de resultar suficientemente atractiva para parte da propia frota.
A formación tamén reclama coñecer que medidas se están adoptando para recuperar a actividade perdida e atraer novamente tanto compradores como embarcacións.
«Nós non queremos que a Lonxa de Laxe perda compradores nin barcos. Queremos exactamente o contrario. Por iso preguntamos», sinalan desde o BNG.
A formación política tamén cuestiona que se atribúan ao seu comunicado determinadas perdas económicas, ao considerar que a diminución da actividade da lonxa é anterior á difusión desa información.
Finalmente, o BNG manifesta a súa disposición a colaborar coa Confraría se esta está a traballar na recuperación da actividade comercial. «Se a Confraría está traballando para recuperar esa actividade, contará con nós», afirma.
Para a formación, unha vez aclarado que a lonxa non pechou, pero a poxa diaria si, o debate debe centrarse agora en coñecer as causas da situación e, sobre todo, en buscar solucións que permitan á Lonxa de Laxe recuperar actividade, compradores e frota e garantir o seu futuro.
