Veciños de Muros denuncian o estado de abandono do camposanto e reclaman unha actuación inmediata
Muros, 5 de agosto de 2026. — O estado de abandono do cemiterio parroquial de San Pedro volve estar no centro das reivindicacións veciñais. Este mércores, 5 de agosto, foi remitido novamente un escrito ao Arcebispado no que se dá conta da situación na que se atopa o camposanto e se reclama que se proceda, con carácter de urxencia, á súa limpeza e desbroce.
A denuncia pon o foco no que os veciños consideran un evidente deterioro dun espazo no que descansan familiares, amigos e coñecidos da comunidade. A maleza e a falta de mantemento provocan, segundo se sinala no escrito, unha imaxe de abandono incompatible coa dignidade que debería ter un lugar de descanso.
«A todo, os veciños non deixan de protestar polo estado de abandono en que se atopa esta pequena necrópole onde repousan familiares, veciños e amigos», recolle a carta remitida ao Arcebispado. No documento tamén se subliña que «descansar eternamente en sagrado quere dun lugar digno, limpo e coidado, non dun espazo esquecido do facer dos crentes».
O escrito fai seu «o forte clamor dos veciños de Muros» e solicita que se ordene «con carácter de urxente» a limpeza do recinto. A petición vai máis alá dunha simple reclamación, xa que se ofrece unha solución alternativa ante a eventual falta de actuación por parte dos responsables.
Neste sentido, o remitente solicita autorización para contratar directamente unha empresa especializada que se encargue da limpeza do camposanto, asumindo persoalmente o custo dos traballos: «Se así non fora, pido o seu permiso para ordenar a unha empresa especializada que proceda á limpeza do camposanto, custe que estou disposto a sufragar».
Xunto coa carta foron achegadas varias fotografías nas que, segundo o denunciante, pode comprobarse «en detalle o estado de total abandono» no que se atopa actualmente o cemiterio parroquial.
A nova petición volve poñer sobre a mesa unha reclamación que vén sendo formulada reiteradamente polos veciños, que agardan agora unha resposta e, sobre todo, unha actuación que permita recuperar unhas condicións dignas de limpeza e mantemento no cemiterio de San Pedro.
