A actuación permitirá renovar a fachada marítima, mellorar a accesibilidade e reforzar a conexión entre o porto e o núcleo urbano.
O Concello de Ponteceso acadou un acordo con Portos de Galicia para levar a cabo un ambicioso proxecto de humanización do acceso ao porto de Corme, cun investimento total de 787.000 euros. A intervención suporá unha transformación da fachada marítima e mellorará a integración do espazo portuario coa vila.
O alcalde de Ponteceso destacou a importancia desta actuación, que cualificou como a máis relevante do mandato en Corme. «Trátase da actuación máis importante do mandato en Corme, un proxecto no que levamos moitos anos traballando e que por fin se fai realidade», sinalou.
Un espazo máis accesible, seguro e pensado para as persoas
O proxecto contempla a creación dunha plataforma única que dará prioridade aos peóns, favorecendo unha circulación máis segura e unha mellor convivencia entre os distintos usos do espazo público.
Ademais, a intervención incluirá a mellora da accesibilidade e da seguridade viaria, a renovación dos servizos existentes e a modernización da iluminación pública.
A actuación tamén permitirá renovar a imaxe do entorno portuario mediante a instalación de novo mobiliario urbano, a creación de zonas axardinadas e a habilitación de miradoiros con vistas ao mar.
Outro dos elementos destacados será a recuperación das vistas sobre a fachada marítima, grazas á demolición parcial do muro de peche, unha medida que contribuirá a abrir o espazo portuario á cidadanía e a mellorar a súa integración paisaxística.
Un investimento conxunto entre Portos de Galicia e o Concello
O investimento ascende a 787.000 euros, dos cales 726.000 serán achegados por Portos de Galicia e os 61.000 euros restantes polo Concello de Ponteceso.
Con este acordo, ambas as administracións impulsan unha actuación destinada a modernizar un dos espazos máis representativos de Corme, mellorar a súa funcionalidade e poñer en valor a relación histórica da vila co mar.
A intervención supón un paso importante na transformación urbana de Corme e na recuperación do seu fronte marítimo como espazo de encontro, paseo e convivencia para a veciñanza e as persoas visitantes.
