Alternativa dos Veciños destaca o avance cara a unha costa pública e accesible para toda a cidadanía*
O Concello de Oleiros contratará de inmediato as obras da senda costeira entre Naval e Canide, un proxecto que contará cun investimento de 1,4 millóns de euros e que permitirá seguir avanzando na recuperación e posta en valor do litoral do municipio.
A actuación busca completar progresivamente a costa libre de Oleiros, favorecendo que os veciños e veciñas poidan gozar do mar e do patrimonio natural a través dun espazo público, aberto e accesible.
Desde Alternativa dos Veciños defenden un modelo de litoral entendido como un ben común, que debe preservarse para o desfrute de toda a cidadanía, fronte á privatización e á ocupación excluínte do territorio.
A formación tamén critica a demora de case un ano que atribúe ao Goberno da Xunta no inicio desta actuación. Segundo denuncia Alternativa dos Veciños, este atraso carecía de xustificación e respondía a unha estratexia de obstaculización dos proxectos impulsados polo Goberno municipal de Oleiros.
Coa contratación das obras entre Naval e Canide, o municipio dá un novo paso cara ao obxectivo de consolidar un litoral público, protexido e accesible, no que a conservación da contorna natural e o desfrute colectivo sexan prioritarios.
