Veciños de Dumbría e Corcubión volven expresar a súa preocupación polos episodios de emisión de fume procedentes da fábrica de Dumbría. Segundo denuncian, aínda que as instalacións dispoñen desde hai anos de sistemas de filtrado que permiten reducir de forma notable as emisións, en determinadas ocasións obsérvanse columnas de fume que saen directamente á atmosfera, especialmente durante a noite ou no luscofusco.
Os residentes lembran que hai anos as fábricas da contorna chegaron a traballar a pleno rendemento mantendo un control moito máis eficaz das emisións, polo que consideran que a tecnoloxía para minimizar o impacto ambiental existe e debe empregarse de maneira continuada.
Tamén fan memoria do importante impacto ambiental que durante décadas tiveron as fábricas de Brens e Dumbría, que durante gran parte do século XX emitiron grandes cantidades de partículas á atmosfera e realizaron verteduras ao mar, nun contexto no que a lexislación ambiental era moi diferente á actual.
Segundo explican algúns veciños, desde hai máis de dúas décadas boa parte das partículas xeradas no proceso industrial son recollidas mediante sistemas de filtrado, almacenadas e posteriormente xestionadas como subproduto industrial, o que supuxo unha mellora significativa respecto ao pasado.
Con todo, os denunciantes reclaman que estas medidas se apliquen sempre e sen excepcións, co obxectivo de garantir a calidade do aire e protexer a saúde da veciñanza e o medio ambiente da ría. Piden ás administracións competentes que comproben o funcionamento dos sistemas de control das emisións e actúen se se detecta algún incumprimento da normativa ambiental.