O 112 recibiu as primeiras chamadas sobre o suceso múltiple pasadas as 8:30 horas desta mañá. Deseguido, os xestores do Centro Integrado de Atención ás Emerxencias de Galicia solicitaron a intervención dos profesionais de Urxencias Sanitarias do 061 e dos axentes da Garda Civil de Tráfico.
Ademais, foron avisados os Bombeiros de Betanzos e o persoal de limpeza e mantemento da propia autoestrada. As primeiras comunicacións co 112 eran confusas en canto ao número de vehículos implicados e posibles feridos, pero, aos poucos, os axentes da Garda Civil de Tráfico aclararon que se trataba de distintos accidentes moi próximos entre si.
De feito, un produciuse no punto quilométrico 10 da AP-9, en Cambre, sentido sur; o seguinte ocorreu no quilómetro 11 do mesmo carril, e o terceiro no quilómetro 12 do mesmo sentido.
En relación ao número de feridos, Urxencias Sanitarias de Galicia-061 confirma que só unha persoa tivo que ser evacuada ao hospital mentres que outras foron atendidas no mesmo lugar dos feitos, segundo apuntaron os medios rescatadores.
