Santiago de Compostela, 29 de abril de 2026.– A Unión de Cidadáns Independentes (UCIN) Galicia reivindicou hoxe o seu modelo municipalista como a ferramenta máis eficaz para facer fronte ás principais carencias que afectan á cidadanía galega. Nun contexto marcado polo envellecemento da poboación, a precariedade laboral e as deficiencias nos servizos públicos, a formación aposta por solucións “dende abaixo”, baseadas na proximidade e na escoita activa da veciñanza.
O coordinador da organización, José Luis Calo, destacou que Galicia “leva anos arrastrando problemas estruturais que non atopan solución dende as grandes estruturas políticas”, polo que considera necesario impulsar políticas útiles, pegadas ao territorio e centradas nas persoas.
Entre as prioridades sinaladas por UCIN Galicia atópanse a mellora da atención sanitaria, especialmente na atención primaria; o reforzo do sistema educativo con máis recursos e menos carga burocrática; e a implementación de medidas efectivas para frear a perda de poboación e a fuga de talento xuvenil.
“Non podemos permitir que o rural siga quedando atrás nin que a mocidade teña que marchar fóra para atopar oportunidades. Galicia precisa un proxecto de futuro que aposte polo emprego de calidade, o acceso á vivenda e a igualdade territorial”, subliñou Calo.
A formación tamén defende un novo modelo económico máis diversificado e sostible, orientado a xerar riqueza e fixar poboación, así como a mellora das infraestruturas e da mobilidade, especialmente nas zonas máis desfavorecidas.
UCIN Galicia reafírmase así como unha alternativa sólida nos concellos galegos, apostando por un municipalismo independente, centrado na xestión eficaz e afastado das dinámicas dos grandes partidos. “Os concellos son a primeira liña de contacto coa cidadanía e deben ser o motor do cambio que Galicia precisa”, indicou o coordinador.
De cara ao futuro, a organización preséntase tamén como unha opción nas próximas eleccións ao Parlamento de Galicia, co obxectivo de trasladar a súa visión municipalista á política autonómica. “Queremos levar a voz dos concellos ao Parlamento e garantir que as decisións se tomen pensando no ben común e non en intereses partidistas”, concluíu José Luis Calo.
