A muller asegura que o menor saharauí que acolleu este verán foi retirado do seu domicilio sen o seu consentimento e reclama explicacións á Xunta e a SOGAPS.
Unha nai de acollida da Costa da Morte remitiu unha carta á conselleira de Política Social e Igualdade, Fabiola García, e ao presidente da Xunta, Alfonso Rueda, para denunciar o que considera graves irregularidades na súa experiencia no programa Vacacións en Paz, destinado a que menores saharauís pasen o verán con familias de acollida.
Na súa misiva, a muller relata o sucedido durante o verán e reclama que as administracións competentes escoiten as familias acolledoras e investiguen os feitos que denuncia. Segundo indica, o caso xa foi posto en coñecemento do xulgado, da Garda Civil e dos servizos de menores, e asegura que achegou probas documentais, testemuñas, vídeos e audios.
Unha acollida marcada pola falta de información
Segundo o seu testemuño, a muller decidiu participar no programa ao coñecer a necesidade de familias para acoller os nenos durante os meses de verán. Porén, afirma que recibiu pouca información sobre o menor que lle foi asignado e sobre a súa situación familiar.
A acolledora asegura que inicialmente lle dixeron que o neno era orfo, pero que, posteriormente, soubo que tiña pai, nai, avós e tres irmáns. Tamén relata que o pequeno amosaba episodios de nerviosismo e temor ante determinadas situacións, polo que solicitou reiteradamente información e axuda aos responsables do programa.
Segundo explica, o menor foi adaptándose progresivamente á convivencia e chegou a establecer un forte vínculo afectivo con ela. A muller afirma que o neno a chamaba «mami» e que expresaba o seu desexo de permanecer coa familia durante as vacacións.
A retirada do menor, punto central da denuncia
O momento máis grave do relato sitúase o 27 de xullo, cando, segundo a súa versión, un delegado da zona acudiu ao domicilio acompañado doutras persoas para levar o menor.
A muller sostén que non lle explicaron a onde o trasladaban e que o neno choraba e se agarraba a ela mentres pedía non marchar. Afirma, ademais, que o pequeno foi levado coa roupa que tiña posta, sen que ela asinase ningún documento para autorizar a saída.
Tras o sucedido, asegura que acudiu á Garda Civil e contactou cos responsables da asociación. Tamén afirma que, ao consultar posteriormente os servizos de menores, lle indicaron que nin ela nin o neno figuraban nos rexistros correspondentes á acollida, unha circunstancia que considera especialmente preocupante.
A partir dese momento, segundo relata, intentou manter o contacto co menor a través da súa familia biolóxica, pero asegura que non puido volver velo nin falar con el directamente.
Denuncia tamén o trato recibido
A carta recolle outro episodio que, segundo a súa versión, tivo lugar durante unha festa de despedida dos menores saharauís en Ponteareas. A muller asegura que se desprazou ata alí acompañada de amigos do neno e dos seus pais coa intención de despedirse del.
Porén, afirma que non lle permitiron falar co menor e que, posteriormente, foi increpada e ameazada por varias persoas vinculadas á organización. Segundo o seu testemuño, a situación provocoulle un episodio de ansiedade e tamén afectou á súa filla, polo que foi necesaria asistencia sanitaria.
A acolledora indica que estes feitos tamén foron denunciados e que dispón dun parte médico e doutras probas para apoiar a súa versión.
O futuro do menor e a petición de explicacións
Máis alá das circunstancias da retirada, a muller expresa a súa preocupación polo estado emocional do neno e pola posibilidade de que non poida regresar a Galicia para participar en futuras edicións do programa.
Na mensaxe que acompaña a denuncia, explica que o menor lle dixo que lle comunicaran que non volvería a España. Tamén asegura que el lle manifestou o desexo de visitala algún día e que a súa familia a convidou a viaxar para reencontrarse con el, aínda que recoñece que o custo do desprazamento lle resulta difícil de asumir.
Segundo relata, o rapaz tamén lle contou que, cando cumpra os 18 anos, quere ir vela e estudar para ser policía.
A muller asegura que continúa profundamente afectada polo sucedido e que o seu principal obxectivo é evitar que outras familias e menores pasen por unha situación semellante.
Na carta dirixida a Fabiola García e Alfonso Rueda, reclama explicacións sobre os procedementos de selección e seguimento das familias de acollida, a coordinación entre a asociación e os servizos públicos e os mecanismos de protección dos menores participantes no programa.
