A Coruña. Unha paciente galega denuncia a sucesión de notificacións administrativas recibidas en relación coa anulación da súa baixa médica, unha situación que, segundo relata, se produciu mesmo durante a súa recuperación tras unha intervención cirúrxica.
A afectada asegura que o procedemento comezou o 6 de agosto, cando a súa empresa recibiu unha comunicación sobre a resolución, antes de que ela tivese coñecemento directo da mesma. Dous días despois puido acceder á notificación do Instituto Nacional da Seguridade Social (INSS) por vía telemática.
Posteriormente, recibiu por correo certificado a resolución do INSS e, días despois, outra comunicación co mesmo contido procedente do SERGAS. Este luns, xa operada e en pleno postoperatorio, recibiu unha terceira notificación, esta vez da Delegación Territorial de A Coruña da Consellería de Sanidade da Xunta de Galicia, tamén datada o 6 de agosto.
A paciente considera que a reiteración de comunicacións por parte de distintos organismos supón unha carga engadida nun momento especialmente delicado. “Tres organismos distintos bombardeando unha paciente enferma co mesmo papel repetido”, denuncia, ao tempo que cuestiona a falta de coordinación administrativa.
A afectada tamén critica que, mentres as distintas administracións lle foron comunicando a resolución, a súa reclamación presentada o 10 de agosto continúa sen resposta.
O caso volve poñer o foco nas consecuencias que poden ter os erros ou desaxustes administrativos sobre as persoas afectadas. A paciente rexeita que situacións deste tipo poidan xustificarse simplemente como “erros debido ao volume de expedientes” e reclama que detrás de cada expediente hai unha persoa, unha situación médica e, en moitos casos, unha familia cuxa economía pode verse comprometida.
“Non son erros de oficina: son vidas, é saúde física e mental e é a economía de familias destrozadas”, sostén.
A afectada reclama unha resposta á súa situación e unha maior coordinación entre os organismos implicados para evitar que unha mesma resolución xere sucesivas notificacións e unha presión engadida sobre persoas que se atopan enfermas ou en proceso de recuperación.