A falta de iluminación nalgúns puntos do paseo fluvial e, especialmente, na Ponte, xera malestar entre os veciños durante estas semanas de verán
Veciños de Ponteceso amosaron o seu malestar polo estado da iluminación pública no paseo fluvial e, de maneira especial, na zona da Ponte, onde aseguran que a falta de luz está a provocar unha importante sensación de inseguridade.
Segundo trasladan algúns residentes, nesta época estival, na que o paseo fluvial conta con maior presenza de persoas durante as tardes e noites, bótase especialmente de menos a iluminación da Ponte situada a carón do río. A situación resulta, ao seu xuízo, difícil de comprender nunha zona tan frecuentada durante o verán.
Os veciños sinalan que varias farolas da Ponte non están funcionando, deixando determinados puntos practicamente ás escuras. A falta de iluminación dificulta a visibilidade e fai que transitar por algunhas zonas resulte incómodo e pouco seguro, especialmente durante a noite.
«É unha vergoña que nesta época do ano a Ponte estea sen a iluminación necesaria», lamentan algúns veciños, que reclaman ao Concello unha actuación para revisar e poñer en funcionamento as luminarias que permanecen apagadas.
A situación tamén afecta á percepción xeral do paseo fluvial, un dos espazos máis utilizados polos veciños e visitantes de Ponteceso durante o verán. Para os residentes, unha correcta iluminación non só é unha cuestión estética, senón tamén de seguridade e de accesibilidade, especialmente nas horas nocturnas.
Os afectados agardan que se revise o estado das farolas e que se solucionen canto antes as deficiencias existentes, para que o paseo fluvial e a Ponte poidan contar cunha iluminación acorde coa importancia que teñen como espazos de paseo, encontro e atractivo turístico do municipio.
