O Concello de Coristanco aprobou en sesión plenaria o Plan Especial de Infraestruturas e Dotacións (PEID), un paso clave para a cualificación dos terreos nos que se construirá un novo equipamento destinado ao uso cultural.
Segundo informou o goberno municipal, o plan xa conta con todos os informes sectoriais e técnicos necesarios para a súa posta en marcha, polo que o proxecto continúa avanzando na súa tramitación administrativa.
Ademais, xa está redactado o proxecto definitivo da infraestrutura, que suporá un investimento total de 1.819.996 euros. O futuro edificio incluirá unha sala de espectáculos, unha sala principal para usos múltiples e tres aulas adicionais destinadas ao desenvolvemento de actividades culturais, formativas e sociais.
Desde o Concello destacan que esta actuación permitirá ampliar e mellorar os espazos destinados á cultura no municipio, favorecendo a programación de eventos, actividades educativas e iniciativas asociativas.
Co obxectivo de facer realidade o proxecto, o executivo local está a manter reunións con distintas institucións para conseguir o financiamento necesario que permita executar as obras nos próximos anos.
O novo equipamento cultural enmárcase na aposta municipal por reforzar os servizos e infraestruturas públicas, promovendo ao mesmo tempo a dinamización social e cultural de Coristanco.
