O polígono industrial de Carballo mellorará a súa conexión co transporte público a partir do vindeiro 25 de maio coa incorporación de dúas novas paradas de autobús situadas na Rúa Volframio e na Avenida Cristóbal Colón.
Estas novas paradas integraranse en 10 servizos diarios de luns a venres, ofrecendo conexión directa con Carballo e A Coruña e facilitando os desprazamentos tanto das persoas traballadoras como das empresas instaladas na zona industrial.
A medida responde a unha demanda histórica do tecido empresarial e laboral do polígono, que levaba tempo reclamando unha alternativa de mobilidade máis eficiente, cómoda e sostible.
Con esta iniciativa, búscase favorecer o uso do transporte público, reducir a dependencia do vehículo privado e avanzar cara a un modelo de mobilidade máis accesible e respectuoso co medio ambiente.
Desde o sector empresarial valoran moi positivamente esta mellora, que contribuirá a reforzar a competitividade do polígono e a mellorar a calidade de vida das persoas que se desprazan diariamente ata esta área industrial.
