A parroquia de Buño viviu na noite deste domingo un episodio meteorolóxico tan intenso como inesperado. Pasadas as 20:30 horas, unha fortísima tormenta descargou sobre a localidade acompañada de abundantes raios, tronos e unha espectacular sarabia que sorprendeu aos veciños.
Segundo relataron varios residentes, “caían pedras do ceo”, facendo referencia ao tamaño da sarabia que chegou a cubrir rúas, coches e tellados en cuestión de minutos. A intensidade da chuvia e do aparato eléctrico provocou momentos de gran preocupación, especialmente entre os condutores e persoas que se atopaban no exterior.
O fenómeno coincidiu xusto coa celebración polo ascenso do Deportivo de La Coruña, algo que non pasou desapercibido entre a veciñanza. Entre bromas e comentarios nas redes sociais, moitos aseguraban que “foi ascender o Dépor e comezar a caer unha tormenta monumental”.
As imaxes compartidas polos veciños amosan un ceo completamente iluminado polos raios e unha intensa cortina de auga acompañada de pedra. Nalgúns puntos da zona rexistráronse pequenas acumulacións de xeo e incidencias menores en vehículos e mobiliario exterior.
A noite deixou unha estampa pouco habitual en Malpica de Bergantiños, mesturando a euforia deportiva cun dos temporais máis impactantes que lembran moitos habitantes da zona nos últimos tempos.
