A Plataforma Stop Biogás A Laracha rexistrou unhas 7.000 sinaturas nunha alegación colectiva contra o proxecto promovido por Bioenergía A Coruña SLU
A Laracha, 25 de maio de 2026.- A oposición veciñal á macroplanta de biogás proxectada na Laracha continúa medrando. Este luns, representantes da Plataforma Stop Biogás A Laracha rexistraron unha alegación colectiva respaldada por arredor de 7.000 sinaturas, nun novo paso da mobilización social contra a iniciativa impulsada pola empresa Bioenergía A Coruña SLU.
Segundo informou a Plataforma, o documento foi elaborado co asesoramento de profesionais especializados, entre eles avogados, biólogos, arqueólogos e outros expertos, que analizaron “de maneira minuciosa” o proxecto presentado pola compañía.
A macroplanta, que se atopa na recta final do período de alegacións, conta xa co rexeitamento explícito de todos os grupos políticos do Concello da Laracha, así como do resto de concellos da comarca e da Deputación da Coruña.
Entre as principais preocupacións expresadas polos colectivos contrarios ao proxecto destacan os posibles impactos ambientais derivados dos vertidos de residuos líquidos ao río Anllóns. A Plataforma alerta de que a instalación podería xerar un volume anual equivalente a 2.000 camións cisterna, o que, segundo denuncian, afectaría aos hábitats fluviais e á calidade da auga utilizada por parte da poboación para o consumo humano.
Outro dos aspectos que máis inquietude xera entre a veciñanza é a posible contaminación do aire e a proliferación de cheiros. Neste contexto, a Plataforma organizou numerosas charlas informativas nas últimas semanas. Nunha delas participou o médico neumólogo Evaristo Lombardero, quen expuxo, segundo a organización, datos científicos e casos reais relacionados cos efectos deste tipo de instalacións sobre a saúde das persoas.
“A loita acaba de comezar e non imos parar”, sinalan desde a Plataforma Stop Biogás A Laracha, que xa prepara novas mobilizacións, actividades divulgativas, reunións institucionais e accións de presión social, legal e política.
Á alegación colectiva sumáronse tamén iniciativas presentadas por diferentes entidades e asociacións locais, entre elas Salvemos o Noso, A.C.D. Santa Lucía, A.C. Comisión de Festas de Soandres, A.D.C. de Soandres e a Asociación de Cazadores de Mantiñán-Soandres.
