Un motorista resultou ferido de gravidade na noite deste martes tras sufrir unha caída cando circulaba pola estrada AC-546, ao seu paso pola parroquia de Ordoeste, no concello da Baña.
Segundo informou o 112 Galicia, foi un particular quen alertou aos servizos de emerxencia poucos minutos despois das 21.00 horas ao atopar ao condutor tendido sobre o asfalto no quilómetro 5 da citada vía. No momento da chamada, o ferido atopábase inconsciente.
De inmediato, o Centro Integrado de Atención ás Emerxencias mobilizou ao helicóptero medicalizado con base en Santiago do Servizo Galego de Urxencias Sanitarias-061, así como á Garda Civil de Tráfico e aos servizos de mantemento da estrada.
Unha vez no lugar, os equipos de emerxencia confirmaron que o motorista recuperara a consciencia, aínda que o seu estado presentaba carácter grave. Tras recibir a primeira asistencia sanitaria, foi trasladado por persoal médico ao hospital de referencia para continuar co seu tratamento.
As circunstancias do accidente están a ser investigadas.