A formación solicita os informes técnicos, resolucións e demais documentación relacionada coa decisión de reforzar estruturalmente a praza
Boiro. UCIN Boiro presentou un novo escrito no Rexistro Xeral do Concello no que solicita o acceso íntegro ao expediente administrativo e a toda a documentación técnica relacionada coa decisión de apuntalar a praza de Galicia, ante as contraditorias declaracións realizadas publicamente por responsables do Goberno municipal.
A formación lembra que o pasado 29 de xuño xa rexistrara unha primeira solicitude para poder consultar os informes técnicos relativos á capacidade portante, ao estado estrutural e ás condicións de seguridade da praza antes da celebración das festas. Porén, as posteriores declaracións do alcalde e do tenente de alcalde, segundo UCIN, suscitaron novas dúbidas sobre a documentación existente e sobre os motivos que levaron a executar o apuntalamento.
Segundo explica a formación, mentres o alcalde asegurou publicamente que o reforzo estrutural estaba decidido desde había dous meses e que formaba parte da planificación previa das festas, o tenente de alcalde manifestou que non existía ningún dano estrutural e que había informes técnicos favorables que avalaban a celebración dos eventos.
O coordinador de UCIN Boiro, Miguel Piqueras, considera que estas afirmacións deben contar cun respaldo documental. «Cando un Goberno asegura publicamente que existen informes técnicos e decisións administrativas que respaldan unha actuación desta importancia, o lóxico é que esa documentación poida ser consultada. A transparencia non pode quedar unicamente en declaracións políticas», sinala.
No novo escrito, UCIN reclama copia íntegra do expediente administrativo, así como dos informes técnicos, resolucións, decretos, comunicacións internas e calquera outra documentación relacionada coa decisión de executar o apuntalamento da praza.
A formación tamén solicita que se facilite o informe técnico ou certificación que acredite que, unha vez retirados os reforzos e rematadas as festas, a praza de Galicia reúne todas as condicións de estabilidade e seguridade necesarias para o seu uso habitual.
Ademais, UCIN pide que, no caso de que algún dos documentos ou informes mencionados publicamente polos responsables municipais non exista ou non conste no expediente, o Concello emita unha certificación oficial que deixe constancia desta circunstancia.
«Non estamos facendo acusacións; estamos exercendo un dereito recoñecido pola lei para comprobar que as afirmacións realizadas polo Goberno municipal contan co correspondente respaldo documental. A cidadanía ten dereito a coñecer a verdade sobre unha infraestrutura pola que pasan centos de persoas todos os días», conclúe Miguel Piqueras.
Todo comezou co concerto da Panorama
Todo comezou en xullo de 2026, coa celebración da verbena e a actuación da Orquestra Panorama en Boiro. Debido ao gran peso das estruturas e á elevada afluencia de público prevista, o Concello tomou medidas para garantir a seguridade estrutural do recinto.
As comprobacións e actuacións realizadas tiveron como obxectivo asegurar que a instalación puidese soportar con garantías o peso do espectáculo e evitar calquera risco durante a celebración.