As axudas permitirán financiar campañas de apoio ao comercio e á hostalaría, festivais, feiras, xornadas culturais e diferentes iniciativas de dinamización económica nos concellos da comarca
A Deputación da Coruña vén de publicar a resolución da liña de axudas destinada aos concellos para a realización de actividades de promoción económica durante os anos 2025 e 2026. Na Costa da Morte, un total de 15 concellos recibirán máis de 274.000 euros para impulsar iniciativas destinadas a dinamizar o comercio local, a hostalaría, o turismo e a actividade económica.
Entre os proxectos beneficiarios atópanse propostas moi diversas, desde campañas de promoción do pequeno comercio ata festivais, feiras, xornadas culturais e programas específicos de dinamización turística.
En A Laracha, a iniciativa Semana de Emprego: A Laracha Conecta contará cunha achega de 28.200 euros, mentres que Camariñas recibirá 15.000 euros para o seu Plan de dinamización turística, cultural e económica para o ano 2026.
Pola súa banda, Carballo contará con 22.500 euros para a celebración do II Festival Onda Bocata Fest. En Carnota, a XIII Mostra de Promoción Local Víndemo Ver disporá de 18.271,68 euros, mentres que Cee recibirá 18.000 euros para as súas actividades de promoción do comercio local durante 2026.
As campañas de Nadal tamén teñen presenza na resolución. Corcubión contará con 11.400 euros para a súa Campaña de Nadal 2025, mentres que Fisterra recibirá 8.700 euros para a súa campaña de promoción.
Outro dos proxectos destacados é a XLIV Festa da Pataca de Coristanco, que contará coa máxima achega de 30.000 euros. A mesma contía recibirá Muros para a celebración da XXI edición das Xornadas de Cultura Mariñeira «Muros Mira ao Mar».
No ámbito da promoción comercial, Laxe e Malpica de Bergantiños recibirán 9.000 euros cada un para desenvolver campañas de promoción do comercio e da hostalaría ao longo de 2026.
Tamén se inclúen Muxía, con 10.000 euros para o programa Rutas do Mar 2026; Ponteceso, con 17.500 euros para a campaña de promoción do pequeno comercio local; Vimianzo, con 30.000 euros para o programa 2026 Promoción Económica Vimianzo; e Zas, que contará con 16.800 euros para a súa campaña de promoción do comercio local.
Apoio ao tecido económico local
O conxunto destas axudas supón un importante respaldo para os sectores comercial, hostaleiro, turístico e cultural da Costa da Morte. As diferentes iniciativas buscan favorecer o consumo de proximidade, incrementar a actividade económica, atraer visitantes e poñer en valor os recursos e produtos locais.
As achegas permitirán aos concellos desenvolver ao longo dos vindeiros meses unha ampla programación de actividades, contribuíndo así á dinamización dos centros urbanos e rurais e ao fortalecemento do tecido económico local.