Ponteceso. — O grupo Apin Ponteceso denuncia a falta de mantemento e limpeza que, segundo sinala, se está a producir en distintos lugares públicos das parroquias do municipio.
A formación critica o estado de abandono que presentan determinados espazos públicos, camiños, zonas verdes e outros puntos de uso habitual para a veciñanza, e reclama ao Concello unha maior atención e unha planificación regular dos traballos de limpeza e conservación.
Desde Apin Ponteceso consideran que o mantemento dos espazos públicos debe ser unha prioridade, non só no núcleo urbano, senón tamén nas distintas parroquias do municipio. «As parroquias tamén forman parte de Ponteceso e os seus veciños merecen contar con espazos públicos limpos, coidados e en boas condicións», sinalan desde a formación.
O grupo municipal pide ao goberno local que incremente a frecuencia das tarefas de limpeza, desbroce e mantemento e que estableza un calendario de actuacións que permita atender de maneira periódica as necesidades das diferentes parroquias.
Apin Ponteceso reclama, ademais, que se actúe con maior rapidez ante as queixas e avisos trasladados pola veciñanza, especialmente durante os meses nos que o crecemento da vexetación e a acumulación de lixo poden empeorar o estado dos espazos públicos.
A formación considera que un municipio coidado contribúe tanto á calidade de vida dos seus habitantes como á imaxe de Ponteceso, polo que insta ao Concello a «non esquecer as parroquias» e a garantir un mantemento adecuado e continuado en todo o territorio municipal.