A Plataforma Adiante cuestiona quen está asumindo o custo da recuperación económica do Concello
A recuperación económica do Concello de Santa Comba está sendo presentada como un dos principais logros da xestión municipal. Porén, detrás das cifras de saneamento das contas municipais existe unha cuestión que tamén merece ser analizada: de onde proceden os recursos que permiten mellorar a situación financeira e quen está asumindo o custo dese esforzo?
En 2023, o Concello chegou a rexistrar un remanente de tesourería negativo de aproximadamente 2,82 millóns de euros. A situación mellorou en 2024, pero esta recuperación financeira produciuse nun contexto marcado por diversas medidas de carácter económico e por un incremento dos ingresos municipais.
Entre esas medidas atópase un plan de axuste aprobado polo Ministerio de Facenda, cunha duración prevista de 15 anos, así como un préstamo superior aos 900.000 euros destinado a facer fronte ao pagamento de facturas pendentes.
Ao mesmo tempo, incrementouse a presión fiscal sobre a veciñanza. O IBI urbano pasou do 0,42 % ao 0,50 %, mentres que a taxa do lixo experimentou unha subida aproximada do 20 %. Segundo as previsións realizadas, só estas dúas medidas permitirían incrementar os ingresos municipais en arredor de 402.000 euros anuais.
A estes recursos hai que engadir as achegas procedentes doutras administracións. Un exemplo é o POS+ 2025 da Deputación da Coruña, que superou os 1,2 millóns de euros, con partidas destinadas tamén a financiar gasto corrente.
Desde a Plataforma Adiante consideran necesario diferenciar entre os ingresos xerados directamente pola xestión municipal e os recursos procedentes doutras administracións. As subvencións e achegas da Deputación, da Xunta, do Estado ou da Unión Europea son fundamentais para os concellos e é positivo que Santa Comba consiga acceder a elas, pero, ao seu xuízo, non deben presentarse como resultado exclusivo da xestión económica municipal.
Por iso, a formación reclama poñer os números enriba da mesa e analizar con detalle as causas da mellora financeira.
¿Estanse saneando as contas municipais como consecuencia dunha mellora real da xestión? ¿Ou a recuperación tamén está sustentada no incremento dos impostos, no recurso ao endebedamento e nas achegas doutras administracións?
E existe unha cuestión máis de fondo: ¿quen está asumindo o custo deste saneamento?
Para a Plataforma Adiante, mellorar a situación económica do Concello é necesario, pero tamén resulta imprescindible explicar á cidadanía como se está conseguindo, canto está custando e quen está pagando a factura.
Porque, máis alá dos titulares sobre a recuperación económica, son os números os que permiten coñecer a realidade das contas públicas.