Operarios da empresa Plaguiber, por encargo do Concello de Carballo, realizaron este martes unha segunda fumigación na rúa Vila de Noia, no barrio do O Chorís, ante a posible presenza dunha praga de pulgas alertada polos veciños da zona.
Os traballos centráronse principalmente nas beirarrúas e nos demais espazos públicos, onde os operarios aplicaron o tratamento previsto para combater a posible presenza destes insectos.
No caso dos espazos privados, as actuacións non poden realizarse sen o consentimento dos propietarios, polo que sería necesaria a petición expresa e a autorización do titular para poder intervir.
Esta é a segunda actuación de fumigación que se leva a cabo na zona, despois de que os residentes alertasen da posible aparición de pulgas.
Segundo apuntan os veciños, o foco podería estar, presuntamente, nalgún baixo ou local da propia rúa Vila de Noia ou de vías próximas, aínda que polo momento non se determinou de maneira oficial a orixe da posible praga.
Os residentes agardan que estas novas tarefas de desinsectación permitan controlar o problema e evitar que a presenza de pulgas se estenda a outras zonas do barrio.