O Concello de Malpica anunciou nas redes sociais a recuperación do aspecto orixinal do Cruceiro de Buño tras os danos sufridos nun accidente de tráfico. Segundo explica o Goberno local, o Concello encargouse de mediar entre Patrimonio e a compañía aseguradora, coordinando os trámites necesarios para que a actuación se realizase conforme ás indicacións de Patrimonio.
O anuncio, con todo, non tardou en provocar críticas entre a veciñanza. Algúns dos comentarios cuestionan o protagonismo que o Concello se atribúe na reparación dun elemento que, segundo sinalan, pertence ao ámbito de Patrimonio e da Igrexa.
«Se dixerades algunha verdade… porque non fixestes nada, que iso é de Patrimonio e Igrexa, pero moi bonito para a foto», reprocha unha das persoas que participou no debate. Outra cuestiona directamente o feito de presentar a actuación como un logro municipal.
As críticas van máis alá do propio cruceiro. Varios veciños aproveitan a publicación para reclamar melloras nas estradas, limpeza das cunetas e atención ás parroquias e aldeas do municipio. «Existen parroquias e aldeas máis alá de Malpica e Seaia», apunta outro comentario.
Tamén aparece entre as demandas a restauración do Cruceiro de Beo, danado igualmente. «Pois agora restaurar o de Beo.
A conservación do patrimonio municipal é outro dos asuntos que centra as queixas. Os veciños mencionan o abandono de muíños e outros elementos patrimoniais, así como a acumulación de maleza en diferentes puntos. Tamén se reclama a limpeza da parcelaria de Cerqueda, especialmente ante a proximidade do rally.
Deste xeito, o anuncio da reparación do Cruceiro de Buño, presentado polo Concello como resultado da súa mediación, acabou converténdose nunha lista de reclamacións veciñais. Para unha parte dos usuarios, o importante non é tanto «colgarse medallas» pola mediación como afrontar o estado de conservación doutras infraestruturas e elementos patrimoniais do municipio.