A falta de mantemento afecta a estradas, camiños, beirarrúas, parques infantís e accesos a servizos públicos
Veciños da parroquia de Esteiro e doutras zonas do municipio denuncian publicamente o grave estado de conservación de numerosas estradas, camiños e equipamentos públicos, unha situación que, segundo sinalan, leva tempo sen recibir unha solución.
Entre os puntos sinalados atópase a carretera de Piñeiro, en Esteiro, onde o deterioro do firme provoca numerosas queixas. Os veciños aseguran que a situación se repite noutras zonas, como Xalfas, Louro, O Ancoradoiro, o camiño do Outeiro e o campo de San Roque.
Especial preocupación existe tamén no contorno do colexio de Louro, ante o inicio do novo curso escolar. Segundo as denuncias, existen tramos da varanda exterior deteriorados, furados na beirarrúa e un estado deficiente na estrada da Lavandeira, vía de acceso ao propio centro educativo.
Os parques infantís tampouco escapan ás críticas. Os veciños denuncian que algúns presentan elementos deteriorados e un deficiente estado de conservación, mentres se anuncia o investimento na construción doutro parque. A pregunta que formulan é clara: por que non se prioriza primeiro a reparación e mantemento das instalacións existentes?
Outro dos puntos que máis preocupación xera é o campo de San Roque, onde, segundo os residentes, existen camiños sen acondicionar e problemas de accesibilidade. A situación, aseguran, pode chegar a dificultar o acceso de persoas con discapacidade e mesmo dos servizos de emerxencia. Segundo explican, as ambulancias poden atoparse con dificultades para chegar ata determinados domicilios, obrigando os profesionais a realizar complicadas manobras.
Á lista de deficiencias engádese o mal estado dalgunhas marquesiñas, outro elemento de uso diario para os veciños e especialmente importante para persoas maiores e estudantes.
As críticas tamén teñen unha compoñente política. Os veciños cuestionan as mensaxes nas que se afirma que se traballa “para todos os veciños” e reclaman que esas palabras se traduzan en actuacións concretas sobre o terreo. “Virédes pedir o voto”, sinalan con malestar, reclamando que as necesidades das parroquias sexan atendidas durante todo o mandato e non unicamente en períodos electorais.
Os afectados consideran que existe traballo máis que suficiente por facer e reclaman unha planificación clara para reparar as vías, mellorar a accesibilidade, garantir a seguridade nos arredores dos centros educativos e manter en condicións axeitadas os espazos públicos.
A demanda dos veciños é, en definitiva, que as administracións responsables deixen de lado as promesas e pasen á acción, atendendo de maneira prioritaria aquelas actuacións que afectan á seguridade, á accesibilidade e á vida cotiá da veciñanza.