A suciedade, a maleza, o óxido no edificio, cables colgando e unha fochanca na estrada son algunhas das deficiencias sinaladas polos residentes
Veciños de Carballo queixáronse do estado no que se atopa a contorna da Casa do Concello, unha situación que, segundo denuncian, ofrece unha imaxe de abandono nun dos espazos máis representativos da vila.
Entre as deficiencias sinaladas atópase a presenza de suciedade en diferentes puntos das rúas próximas ao edificio municipal, así como a abundante maleza que medra en varias zonas da contorna. Os veciños tamén alertan da existencia de arquetas cubertas pola vexetación e da maleza presente mesmo no tellado do edificio.
Outro dos aspectos que chama a atención é o estado dalgúns elementos da propia Casa do Concello. Segundo indican, existen zonas con presenza de óxido, ademais de cables que permanecen colgando e que contribúen a transmitir unha sensación de falta de mantemento.
As críticas esténdense tamén á valla decorativa que separa o edificio do Concello da Praza de Abastos, que presenta, segundo os residentes, un evidente deterioro e necesita traballos de pintura e conservación.
A estas deficiencias súmase a presenza dunha fochanca na estrada que pasa por diante da Casa do Concello, unha incidencia que os veciños consideran necesario reparar para mellorar tanto a seguridade como a imaxe desta céntrica zona.
Os residentes reclaman unha actuación de limpeza e mantemento que permita recuperar o bo estado da contorna, retirando a maleza, limpando as arquetas, reparando os elementos deteriorados e acometendo as melloras necesarias no edificio e nos seus arredores.
A Casa do Concello é un dos principais edificios públicos de Carballo e, precisamente por este motivo, os veciños consideran que a súa contorna debería presentar unhas condicións axeitadas de conservación e coidado.
