Patricia Iglesias e Mónica Rodríguez analizan o impacto da modificación do canon eólico e reclaman á Xunta adaptar a fiscalidade á nova realidade dos parques
Vimianzo, 21 de setembro de 2026.– A deputada do PSdeG no Parlamento de Galicia Patricia Iglesias Rey mantivo unha xuntanza coa alcaldesa de Vimianzo, Mónica Rodríguez, para analizar o impacto que a repotenciación dos parques eólicos pode ter sobre os recursos económicos que recibe o concello.
Vimianzo conta actualmente con 88 aeroxeradores e máis de 123 MW de potencia instalada, segundo os datos manexados polo PSdeG. Entre as instalacións existentes destaca o parque de Monte Redondo, con 66 aeroxeradores e 49,5 MW de potencia.
Patricia Iglesias advertiu de que o proceso de repotenciación pode provocar unha redución dos ingresos públicos que perciben os concellos afectados, a pesar de que as instalacións continúen xerando afeccións sobre o territorio.
“Vimianzo leva décadas soportando no seu territorio os impactos dos parques eólicos e agora corre o risco de que a repotenciación reduza os recursos públicos que recibe, sen que desaparezan esas afeccións territoriais”, sinalou a parlamentaria socialista.
Segundo explicou Iglesias, esta situación estaría relacionada coa modificación do canon eólico da Xunta, que cambiou a súa base de cálculo, e cun modelo de repotenciación baseado na substitución de varios aeroxeradores por máquinas de maior potencia.
As simulacións realizadas polo PSdeG sobre os parques que están entrando neste proceso apuntan a que a recadación podería chegar a reducirse nun 64%, cun impacto tamén sobre os recursos do Fondo de Compensación Ambiental destinados aos concellos afectados.
“É difícil de explicar que con menos aeroxeradores se poida producir máis enerxía e aumentar a rendibilidade das instalacións, pero que os concellos que acollen eses parques poidan acabar recibindo menos recursos públicos”, afirmou Iglesias Rey.
Desde o PSdeG consideran que o debate non debe centrarse en cuestionar a repotenciación dos parques, senón en garantir que a súa modernización vaia acompañada dun retorno económico adecuado para os territorios que acollen as instalacións.
Por este motivo, a formación socialista reclama á Xunta de Galicia unha modificación do canon eólico que adapte a fiscalidade á nova realidade tecnolóxica dos parques e evite que concellos como Vimianzo perdan capacidade económica como consecuencia dos cambios nas instalacións.
“Non podemos pedir ao rural que soporte os parques, as súas afeccións e a transformación do territorio e, ao mesmo tempo, quitarlle recursos. Se cambia o número de máquinas, tamén ten que cambiar o canon para garantir o retorno aos concellos”, engadiu a deputada.
A proposta do PSdeG, segundo trasladou Iglesias, pasa por compatibilizar o incremento da produción de enerxía renovable coa garantía de maiores retornos económicos para os territorios nos que se instalan os parques.
“Máis enerxía renovable, si, pero máis negocio para os territorios que a producen, tamén. O vento galego non pode deixar máis beneficios privados e menos recursos públicos para concellos como Vimianzo”, concluíu.
