Veciños e usuarios da vía sinalan a escasa visibilidade como un posible factor no atropelo e aseguran que o alumeado público estaba apagado no momento do accidente
O accidente rexistrado o pasado sábado en Santa Comba continúa xerando reaccións entre os usuarios da vía, que poñen o foco nas condicións de visibilidade existentes no momento do sinistro.
Segundo denuncian varios usuarios, a iluminación na zona era moi escasa, chegando a ser practicamente nula, xa que o alumeado público permanecía apagado cando se produciu o accidente. Ao seu entender, esta circunstancia puido dificultar a visibilidade e contribuír ao atropelo.
As persoas que trasladaron esta denuncia aseguran que regresaron ao mesmo punto o domingo, aproximadamente á mesma hora, e comprobaron que o alumeado público estaba acendido. Por este motivo, consideran que, de estar funcionando tamén o sábado, as condicións de visibilidade poderían ter sido diferentes e, segundo a súa percepción, mesmo poderían ter axudado a evitar o atropelo.
“Calquera dos que estabamos alí vimos que lle podería pasar a calquera”, sinalan os usuarios, que queren deixar claro que non consideran que a idade das persoas implicadas sexa a explicación do sucedido.
“Non por ser xente maior pasou”, apuntan, insistindo en que as condicións da vía e, en particular, a falta de iluminación, deberían ser tidas en conta á hora de analizar o accidente.
Estas declaracións forman parte das testemuñas e percepcións dos usuarios da vía. A determinación das causas concretas do accidente corresponderá ás autoridades e aos informes correspondentes.
